21/02/2024 15:47
728 x 90

Paşinyan Ukrayna ilə dialoqu genişləndirir - Rusiyaya yeni sürpriz...

Vüqar Rəhimzadə: “Bu, Ermənistan hakimiyyətinin necə riyakar mövqedən çıxış etməsinin göstəricisidir”

img

İrəvandan Rusiyanı qəzəbləndirəcək daha bir addım. Belə ki, Ermənistanın Təhlükəsizlik Şurasının katibi Armen Qriqoryan və Ukrayna prezidentinin aparat rəhbəri Andrey Yermak Maltada görüşüblər.

Görüşdə ikitərəfli əlaqələr və enerji sektorunda əməkdaşlıq perspektivləri müzakirə edilib. Tərəflər Ermənistan və Ukrayna arasında ikitərəfli münasibətlərin hazırkı vəziyyətini müzakirə edib. Bu xüsusda Ukrayna Prezidenti Vladimir Zelenskinin oktyabrın 5-də Qranadada keçirilən Avropa Siyasi Cəmiyyətinin Zirvə toplantısı çərçivəsində Ermənistanın Baş naziri Nikol Paşinyan ilə ilk görüşünün əhəmiyyəti qeyd edilib. Yermak baş nazirin xanımı Anna Akopyanın sentyabrın əvvəlində Kiyevdə keçirilən Birinci Xanımlar və Cənablar Sammitində iştirakına, eləcə də ukraynalı məktəblilərə humanitar yardım göstərdiyinə görə minnətdarlığını bildirib. Prezidentin aparat rəhbəri Ukrayna tərəfinin Ermənistanla əməkdaşlığı gücləndirmək, xüsusən də Avropaya inteqrasiya məsələlərində sadiqliyini təsdiqləyib.

  • “Sabah buna görə elə situasiya yarana bilər ki, Paşinyanı nəinki Fransa, kollektiv Qərb belə xilas edə bilməyəcək”

Məsələ ilə bağlı “Bakı-Xəbər”ə açıqlama verən “İki sahil” qəzetinin baş redaktoru Vüqar Rəhimzadənin fikrincə, bu, Ermənistan hakimiyyətinin necə riyakar mövqedən çıxış etməsinin göstəricisidir: “Ukraynada müharibə başlanandan Ermənistan bir dəfə bu ölkəyə humanitar yardım göstərməyib. Paşinyan utanmadan bəyan etdi ki, guya Ermənistan bu müharibədə tərəf deyil. Çox keçmədən məlum oldu ki, Ermənistan Rusiyaya tətbiq olunan sanksiyalardan yan keçərək bir sıra məhsulların bu ölkəyə ötrülməsində fəal iştirak edir. Yeri gəlmişkən, həmin siyasət bu gün də davam edir. Bütün bunlar Ermənistanın necə simasız siyasət yürütməsinin göstəricisidir. Bu gün yaxınlıq etdikləri ölkəyə sabah rahatlıqla xəyanət edirlər. Ermənistan sənədlərdə Rusiyanın rəsmi müttəfiqidir. Ermənistan iqtisadiyyatının ixracatının 50 faizdən çoxu Rusiya bazarıdır. Ermənistanın illik qaza olan tələbatı hardasa 2,5 milyard kubmetrdir. Bunun 2-2,1 milyard kubmetri Rusiya hesabına təmin olunur. Ermənistanın mədən sənayesində Rusiya şirkətləri aparıcı mövqeyə sahibdir. Ermənistan sərhədlərini Rusiya qoruyur və s. Bütün bunların fonunda Paşinyan, guya müstəqil siyasət yeridir. Əlbəttə ki, bu mümkün deyil. Ermənistanın artan anti-Rusiya demarşları təsadüfi deyil. Şübhə etmirəm ki, bu, Fransadan gələn təlimatlara əsasən həyata keçirilir. Çünki Fransa Ermənistanda Rusiyanı əvəzləmək üçün bütün resurslarını səfərbər edib. Armen Qriqoryanın Andrey Yermakla görüşməsi də bunun tərkib hissəsidir. Bununla Paşinyan Kremlin əsəbləri ilə oynayır. Ancaq belə gedişlərin Paşinyana müsbət nəsə vəd etdiyini düşünmürəm. Sabah buna görə elə situasiya yarana bilər ki, Paşinyanı nəinki Fransa, kollektiv Qərb belə xilas edə bilməyəcək”.

Vidadi ORDAHALLI

Peşə etikası

Son xəbərlər

Ən çox oxunanlar