Kamran Əsədov: “Müsabiqə şərtləri var və hər 1 bal müqəddəratı həll edir”
Sertifikasiya imtahanlarının nəticələrinə əsasən Elm və Təhsil Nazirliyi tərəfindən differensial əməkhaqqı artımı tətbiq olunur. Əməkhaqqının artırılma faizi isə düzgün cavablandırılan və toplanılan balın miqdarından asılı olaraq dəyişir. 51 baldan yuxarı toplayan müəllimlərin əməkhaqqına 35%, 50 baldan aşağı isə 10% artım tətbiq olunur.
Bu şəkildə artım edilməsi bəzi müəllimlər tərəfindən narazılıqla qarşılanır. Onların sözlərinə görə, 48-49 bal toplayan müəllim sualları 80% düzgün cavablandırılmış hesab olunur. 80% doğru cavab üçün isə 10 % artım azdır.
- “Müvafiq qaydalara uyğun olaraq 51 və daha yüksək bal toplayanlar 5 il ərzində əməkhaqqlarına 35 faiz əlavə alacaqlar”
Müəllimlərin narazılığına şərh verən təhsil eksperti Kamran Əsədov “Bakı-Xəbər”ə bildirdi ki, hazırda ölkənin 4432 orta ümumtəhsil məktəbində 150 min müəllim çalışır. “İndiyə qədər bizim müəllimlərimiz yalnız 2014-1018-ci illərdə diaqnostik qiymətləndirməyə cəlb olunublar, onların bilik və bacarıqları ilə bağlı ən vacib informasiyamız məhz həmin illərə aiddir. Həmçinin qeyd edim ki, bizim müəllimlərin işə qəbul imtahanında hər il həyata keçirdiyimiz imtahanlar nəticəsində də onların bilik və bacarıqları ilə bağlı informasiyalarımız olur. Yəni biz bilirik ki, müəllimlərimizin ixtisas, eyni zamanda kurikulumla bağlı bilikləri hansı səviyyədədir. Buna müvafiq olaraq müsabiqə şərtləri müəyyənləşdirilir. Bu müsabiqə şərtləri nəticələrə görə birmənalı şəkildə dəyişmir və dəyişdirilmir. Sertifikasiya 2022-ci ildən başlanıb. Birinci serifiyasiyada 2022-ci ildə ibtidai sinif müəllimləri iştirak edirdi və 743 nəfərə yaxın şəxş müvafiq bilik və bacarıqlara malik olmadıqlarına görə onlarla bağlanmış müqaviləyə xitam verdildi. Yəni 743 şəxs bu prosesdən uzaqlaşdırıldı, onların yerinə yeni müəllimlər cəlb edildi. Bu heç bir halda müəllim qıtlığı kimi başa düşülməməlidir. Yəni bizim ehtiyatda kifayət qədər müəllim kontingentimiz var”-deyə K.Əsədov qeyd etdi.
K.Əsədovun sözlərinə görə, hər il müəllimlərin işə qəbul imtahanında iştirak edın və müsabiqə şərtlərini ödəyən kifayət qədər müəllim var ki, sertifikasiya imtahanları nəticəsində işini itirmiş müəllimləri əvəz etmək mümkündür. K.Əsədov qeyd etdi ki, digər qaydalara əsasən bizdə ciddi şəkildə ibtidai siniflərdə müəllim çoxluğu var, biz ibtidai siniflərlə bağlı müəllim qıtlığı yaşamırıq. “Bir çox məktəblərdə sinif sayından dəfələrlə çox ibtidai sinif müəllimi olduğu üçün sertifikasiyadan keçə bilməyən müəllimlər sistemdən uzaqlaşdırılacaqlar və uzaqlaşdırılırlar da, onların yerinə digər müəllim həmkarları dərs saatını alırlar. Bir məqamı qeyd edim ki, müvafiq qaydalara uyğun olaraq 51 və daha yüksək bal toplayanlar 5 il ərzində əməkhaqqlarına 35 faiz əlavə alacaqlar. 30 baldan 50 bala qədər toplayanlar isə 10 faiz əlavə alacaqlar. 51 faiz toplayanlar 35, 50 bal toplayanlar 10 faiz əlavə alırlar. Əgər 50 bala güzəşt edilsə o zaman 49 bal qazanan deyəcək ki, mənə də güzəşt tətbiq edilsin. Ona görə də, əməkhaqqının bu formada artması normaldır. Müsabiqə şərtləri var və hər 1 bal müqəddəratı həll edir”-deyə K.Əsədov qeyd etdi.
İradə SARIYEVA
